2015年3月28日：荒失失企鵝

終於同到豬公1齊睇荒失失企鵝啦！

今日要去葵芳睇早場，同豬公係屋企樓下既大家樂食過早餐後，就坐巴士去葵芳。
食完早餐都無1個鐘，我又肚餓啦，係STARBUCKS到買左個Bagel黎食。
食完就剛剛好去睇戲啦。

睇完戲，又開始眼訓啦。
同豬公係和民食LUNCH時，我都訓得著，上到巴士又訓，返到屋企仲要訓。
訓訓下，右腳突然抽筋，好彩今次有豬公係到，佢幫我按摩先好快無事。

到最後我訓得太晏＋仲未執好換季既衫，所以唔可以即日來回返娘家。

2015年2月27日：心臟覆診

今日訓訓下抽筋，抽完右腳筋，再抽埋左腳筋，痛死我啦。
訓醒後，個大大既蛋糕俾我1下次食晒。
之後就要出門去醫院覆診，行去巴士站期間，遇到舊公司既同事，傾左幾句。
再到巴士站等車時，遇到就快畢業既學生，睇見佢地個樣無變，但身高拉長左，覺得時間過得真係快。
我離開呢間特殊學校後，都轉左3份工啦，但係我人生入面，我工作時期＋最鍾意既就係呢份工。
學生仲記得我係書記姑娘，有個學生仲勁，佢記得我既全名，好記性。

心臟覆診時要量血壓99/70，心跳105。
今日又未出到報告啊，又係白行1趟。
不過醫生好好，佢叫我等佢電話，唔使專登返黎覆診睇報告。

覆診完後，我就去左姑姐屋企，今晚係到食飯，又有好野食啦。