＊大約5:20AM，個肚就好似CALL機咁係到震，之後Pop1聲，以為自己失禁瀨尿。
諗住起身做清潔，點知再郁又不自覺地再流多次，呢下意識到自己係穿左羊水。
叫醒豬公＋媽咪準備入院。
＊5:56AM，沖完涼，見有少少紅。
＊6:25AM，準備出門時又再流羊胎水，只好濕住條裙，流住咁出門。
＊為免整污糟的士，所以上車時用左第1張既床墊黎墊住，但到最後都係再流出黎（原來羊胎水係黃黃地色，好似尿尿咁。）。
＊太緊張啦，我同的士司機講去聯合急症室，搞到落錯位置。
急症室唔收我，要我地自己行返上產房。好彩有個救護員好好人，幫我地拎架輪椅，叫豬公推我坐Lift上2樓產房。
＊6:55AM到左產房，姑娘問完野後，就入房訓低睇下開左幾多度，聽到好似話開得好少未生得，我當時只係諗捱唔捱到5月5日出世呢？
＊7:20AM，開始陣痛。
＊8:20AM，落藥令子宮開，好快就開始每3-5分鐘陣痛1次。
姑娘就幫我帶氧氣+笑氣，呢個時候豬公就入黎陪產啦。
＊每3-5分鐘陣痛1次，就好似食錯野搞肚痛，但又搵唔到廁所既感覺。
成日以為自己要臭臭，所以係咁按鐘叫姑娘俾我去廁所。
到最後，真係有種［唔得啦，要瀨啦，快啲俾我去廁所］，忍唔住要捱鬧咁按鐘。
姑娘入左黎後，望1望，就話唔係臭臭黎，係BB個頭準備出黎，叫我忍住。
＊11:50AM，助產士入房，叫我忍住道氣，係痛時就要用下身出力咁痾。
助產士不停係咁講野叫我回應，但我用力太多次，搞到無氣力回應佢，當時有種好似要昏迷既感覺。
最後1次用力1痾，就感覺到姑娘剪開左我陰道，有舊野就痾左出黎。
＊12點幾就生左羊咩女出黎啦，勁多頭髮啊，姑娘睇到都話好得意。^W^
佢地係我旁邊清潔BB，有人就係我肚到推個胎盤出黎，同埋鏠針。
之後放BB係我身上，呢個感覺好奇妙，咁大個BB會塞得落我個肚，呢下肚仔就好似個波漏氣咁扁左。
BB係我既止痛藥，姑娘係我下面鏠針我都唔覺痛。
＊BB重3.02KG，我都覺自己好叻，能夠忍痛順產。
＊大約3點幾，姑娘推BB入房，我可以再近距離望到BB，佢真係好多頭髮，又黑又厚又長。
之後有啲好似係嬸嬸既職員入黎教我點餵母乳。
＊藥力過左，個傷口痛之餘仲有粒痣瘡因生BB而谷左出黎。T.T
＊我姑姐好好，整左啲粥+好似係炒米水既野俾我食。
＊呢晚我真係好累好累，但我個心都唔願訓咁望住個女，怕個女太得意俾人抱走左，唔見左佢（想得太多 一.一）。
＊BB，歡迎你黎到呢個世界。
人生既新1章開始啦。
沒有留言:
張貼留言