2015年3月14日：白色情人節＋影大肚相＋西貢BBQ

今日係白色情人節＋BB仲有2個月就出世，我專登選呢日黎影大肚相。

訓醒執好個樣後，就同豬公帶齊BB既髮夾同鞋仔就出門。

等車期間，又黎料啦，個人突然好累，眼前既野突然黑左，成個人軟晒。

豬公帶我坐低後，係咁問我野，我只係聽到，無辨法應到佢。

無咩事後，我地繼續等車出去食野（冬蔭公公）。

大約2點就坐車入西貢，2點半左右就到西貢獅子會自然教育中心，攝影師同佢太太都到左等我地。

果到環境好靚，只係行得辛苦少少。

天氣雖然天陰陰，仲有毛毛雨，但攝影師都影得好靚，影到好似陽光普照咁，哈哈。

影完相，同豬公去左西貢中心附近食左個下午茶。

再行去叔叔屋企BBQ慶祝3月份生日既屋企人。

今日好開心，影靚相＋同親戚慶祝3月份生日既壽星女（姑姐同表姐）。

2015年3月6日：血壓低+嘔

琴日早上食左個麥記做早餐，做左個7-11迪迪尼交收，跟住幫屋企人拎野。
再返屋企訓左個覺後，就帶住啲行李返娘家待產。

食過晚餐後，開始頭暈，諗住拿拿聲沖完涼上床訓，點知沖完涼暈得仲勁。
暈到要訓係床上，我MAMI幫我吹頭，一個轉身，將全份晚餐嘔晒出黎。
到最後都要CALL白車入院。

醫生話血壓低＋子宮收縮，要吊鹽水，再坐白車轉送去聯合醫院。
去到聯合，要駁胎心機1個鐘，醫生話見到子宮有收縮情況出現，所以要留院觀察。

醫生怕BB早產，所以建議我每12個鐘係PATPAT到打枝抗生素針過俾BB，前後打4枝，痛死T.T

食過早餐後，護士送左我去4樓婦科病理室，全日就要係到過啦。

我媽咪同妹妹係探病時間，帶左好多野食俾我。
豬公都係教完波先過黎探我。