老虎乸﹒部落: 玩

2018年4月24日星期二

20180424：【為什麼「接納」必須是第1步？】＠媽媽谷

20180424：【為什麼「接納」必須是第1步？】@媽媽谷

「我仔上堂成日郁來郁去，又會傾計，俾老師投訴可以點做？」
「老師話我仔太被動，所有人出晒去佢都坐咗係度，郁都唔郁，可以點做？」

嗱，世事就係咁，你睇人好，人睇你好。其實，小朋友上堂郁定唔郁都會令某D老師不滿，所以，媽媽，你不孤單。但最重要係，小朋友上堂表現如何、如何改善進步，都屬老師工作範圍，爸媽不必勞心勞力撈過界。記得一位心理治療師講過︰如果佢唔需要我幫忙，佢就根本唔需要係我面前出現，而又如果佢表現得所謂「唔合作」，哩個責任一定係我身上，而唔會係佢身上。

返學上堂，原理大同。
要學生投入合作係老師責任，而且係最基本責任。如果小朋友唔投入，你再好的活動再有用的知識都傳遞唔到俾學生，咁上課來做咩？老師搞唔掂，係老師要自己面對的問題，你係幫唔到佢。

老師職責，爸媽好容易可以越權，但「家教」部份，就無人可以代勞。還請爸媽先專注「家庭教育」，如果小朋友有安全感、自信、有禮、負責任，咁，課堂上發生的問題，一律都唔可以算係你頭上。

話說回頭，「接納」非常重要。
小朋友好動(行動型)，落到一間傳統學校，「唔准郁唔准笑唔准瓜瓜叫」，出事係必然的，我諗，爸媽最能夠做到的，除咗轉校、平日帶多D小朋友出去放電外，就係「接受」。接受，佢，就係咁樣樣。

我幼稚園開始俾老師投訴多咀，1星期總有幾日要坐係門口個孤島。(罰？小朋友未有哩個概念，我只知道無啦啦又要人坐開去。)直到中四家長日，班主任仍然同緊我阿爸阿媽講︰你女呢，上堂成日都傾計喎。

我阿爸阿媽從未有因為咁而話過我，都係HEA下MISS咁講幾句︰係啦係啦，佢由細到大都係咁。

我又無因為「多咀」哩樣嘢有任何不良感受。原因，我細細個已經成日係屋企摷嘢睇，睇過我爸張小學成績表，老師評語︰XXXXXXX唯多言，宜改善。

善莫大焉！
遣傳嘛！

雖然，班上有個多咀學生係會影響到「課堂秩序」，不過，哩個依然係老師教學理念同教學法的問題，點可以善用哩個學生多咀的特點利便上堂呢？佢要返去諗啦。如果我功課無問題，成績又唔差，其實我上堂多咀真係唔需要點處理架喎。(而且，係處理唔到，中四後無投訴，一來，老師放棄咗，二來，AL時都識性啦，咩堂傾得咩堂唔傾得心裡有數。)

「放棄治療」係最好的做法。
你由我啦。

講返唔郁的小朋友。
媽媽好心急問點可以令小朋友主動D。我多口問句︰爸媽係咪D好中意玩，成日上山下海的人？

媽媽定咗幾秒，然後答︰我同我老公都係慢到爆。

咁，就學下接納小朋友的「慢」啦。正如，你都已經接納咗自己慢咗幾十年一樣。你今天唔係都活得幾好咩？

2016年2月29日星期一

2016年2月29日：超好玩公園4大玩樂裝置@Sunday Kiss

2016年2月29日：超好玩公園4大玩樂裝置@Sunday Kiss
-----

小朋友都愛到公園玩，五顏六色的遊樂場設施，可以讓他們爬上爬落，又跑又跳，開心到不得了！不過有父母感到現在的公園設施不及小時候的好玩嗎？為求安全，長滑梯、高攀架、快速氹氹轉全都不見了，公園個個像倒模式一樣，不過在元朗的新興大型商場的戶外綠化空間就有一個超好玩嘅公園，連大人也可以玩呢！

公園的設計師在4大裝置上，加入藝術及玩味元素，睇得又玩得，部分裝置晚上還會亮燈。本來公園只開放一陣子，但後來延長日子到今年3月，至於會否再延長，就要視乎商場之安排。公園早前更由紫色改為紅色，配合聖誕及農曆新年假期主題。

1. design chair 鞦韆

鞦韆區由不規則的支架撐起，掛着兩款鞦韆，一款恰如design chair半球體，另一款猶如沙包，玩法各異，前者老少咸宜，小朋友可窩在裡面盪來盪去，老人家亦可當搖椅坐；後者是比較少見的沙包型球體鞦韆，小朋友可輕易攬着支架，大人則需要借助鐘擺原理，跳上沙包及用力支撐搖擺，玩法甚有難度。場內兩款共八個鞦韆，變出多種玩法組合。

<=場內有8組鞦韆