2015年5月13日：社康姑娘上門檢楂傷口+睇BB

第1次帶BB去健康院檢查。
頭圍有34.1CM，重3.07KG，黃疸指數有215度。
健康院檢查黃疸係唔使抽血，只係用部機係心口嘟3次就知度數。

出院時報左要社康姑娘上門檢查傷口+睇BB。
姑娘話我傷口仲有啲發炎，同埋睇埋我點餵BB食母乳。

2015年5月10日：我既第1個母親節

2015年5月10日，我既第1個母親節。

我既母親節禮物係BB出院，醫生話BB既黃疸指數係203度可以出院。
今日同房既大部份BB都係呢1日出院，相信係好多媽咪收到最開心既禮物。

今日有好多人黎探BB，我既家人、姑姐、奶奶……
探BB係1件開心既事，但我都想屋企人明白，我剛剛生院BB唔夠1個星期，我同BB都需要休息。
BB連名都未起好，就不停問我百日宴幾時搞？係邊到搞百日宴？擺幾多圍？
我果刻真係好唔開心，每日為BB既黃疸煩惱，BB又要食得密食得多痾得多，每日都唔夠訓，而家仲要煩百日宴。
希望將準備做嫲嫲同婆婆既人會明白產婦既煩惱同需要。

2015年5月7日：BB出院啦

YEAH！！！
BB出院啦，好開心啊。
佢既黃疸指數可以俾佢出院，但聽日都要返黎覆診。
BB出院前打埋卡介苗就走得LU~

2015年5月6日：出院

我今日可以出院啦，但BB仲要留院照燈。

我等埋豬公放工後，1齊探BB，之後先搞出院手續。

返到屋企，但個心仲係好掛住BB，好想時間過得快啲，期待聽日探佢。

我個傷口好痛，再加埋個痔瘡，真係怕左坐低。
豬公見我坐爆左水泡，佢醒目到走去日本城買個兒童學習坐廁板俾我坐。
佢話廁板無咁易坐爆，仲可以等BB大個都可以用得返。

2015年5月5日：BB有啲黃，要照燈。

今日上午姑娘同我講BB有啲黃，要去3樓照燈。

食過午餐後，我落左去3樓既加護病房探BB，呢到只可以俾BB既父母入去。
入到去，見到自己既BB訓係個箱仔，帶住＜太陽眼鏡＞剝光豬咁＜晒太陽＞，忍唔住喊出黎，覺得好似帶左個BB出黎受苦。

醫生話我聽日可以出院，可以去聽出院講座。
呢個講座係每個產婦出院前都1定要聽，護士會提大家係邊到幫BB做出世紙、改名過左幾多日要罸錢、幾時要打針……等等資料性既野。

生BB時谷左痔瘡出黎，奶奶買既水泡都俾我坐爆左＝。＝

BB今日既黃疸指數係234度。

2015年3月8日：出院啦

終於出院啦，係醫院真係好悶，訓要俾人限住，食又俾人限住，睇電視又俾人限住。
所以一聽到俾我出院我就超開心，係咁SEND WHATSAPP俾我屋企人。

醫生話我羊胎水多，怕胎水多易早產，寫紙要我抽血驗糖尿。

等到大約6點半，豬公放工黎到醫院接我出院，交埋$200住院費就走得啦。

2015年2月15日：走佬袋資料

豬公朋友俾我既走佬袋資料：
＊防滑拖鞋
＊1套BB出院時著既衣服
＊1套自己出院時著既衣服
＊產後護理包既物品：產婦衛生巾＋網褲（用以固定衛生巾）＋大墊床紙＋小墊床紙＋會陰沖洗器